Azərbaycan News Agency

Ukrayna Prezidenti Volodimir Zelenski Rusiyanın həyata keçirdiyi hücum və ölkədəki son vəziyyət barədə açıqlama verib.

Zelenski hücumların nəticələri barədə bildirib: “Rusiyanın böyük hücumundan sonra Kiyev, Sumı, Xarkiv, Dnipro və Mikolayiv bölgələrində vəziyyətin aradan qaldırılması üzrə işlər davam edir. Bütün zəruri xidmətlər səfərbər edilib. Rusların əsas hədəfi Kiyev bölgəsinin enerji infrastrukturu idi, lakin təəssüf ki, adi yaşayış binaları, məktəblər və mülki müəssisələr də birbaşa zərbə alaraq zədələnib.”

Zelenski hücumun texniki detalları ilə bağlı da bildirib: “Gecə ərzində ruslar müxtəlif növlərdən təxminən 430 pilotsuz uçuş aparatı və xeyli sayda raket buraxıblar. Yalnız ballistik raketlərin sayı 13 idi və bu hücumda raketlərin ümumi sayı 68 olub. İlkin məlumatlara görə, bunların 58-i hava hücumundan müdafiə sistemlərimiz tərəfindən zərərsizləşdirilib.”

Təchizat proseslərinin sürətləndirilməsinin vacibliyini vurğulayan Zelenski deyib: “Raket təchizatı ilə bağlı heç bir razılaşma gözləyə bilməz — hər şey mümkün qədər tez həyata keçirilməlidir. Hava hücumundan müdafiə raketlərinin istehsalını artırmağa yönəlmiş razılaşmalarımız kritik istiqamətdir və bu istiqamət yüz faiz diqqət tələb edir. Rusiya Yaxın Şərqdəki müharibədən istifadə edərək Avropada və Ukraynada daha böyük dağıntılar törətməyə çalışacaq.”