Azərbaycan News Agency

Ukrayna Prezidenti Volodimir Zelenski Dublində Ukraynanın beynəlxalq tərəfdaşları ilə çoxtərəfli görüş keçirib. Görüşdə Fransa Prezidenti Emmanuel Makron, Almaniya Kansleri Fridrix Merts, Polşanın Baş naziri Donald Tusk, NATO-nun Baş katibi Mark Rutte və Avropa İttifaqının rəsmiləri də daxil olmaqla çoxsaylı lider və nümayəndə iştirak edib.

Zelenski görüşdə Rusiyanın davam edən hücumlarına qarşı Ukraynaya göstərilən dəstəyin gücləndirilməsini müzakirə etdiklərini bildirib. Hava hücumundan müdafiə sistemləri üçün raket tədarükü, enerji yardımı və yeni sığınacaqların tikintisinə töhfələrin gündəmdə olduğunu qeyd edən Zelenski, Ukraynanın maliyyə dayanıqlığının artırılması, PURL proqramına yeni töhfələr və təhlükəsizlik zəmanətləri məsələlərinin də nəzərdən keçirildiyini açıqlayıb.

Zelenski gələn həftə Berlində Könüllülər Koalisiyasının toplantısının keçiriləcəyini və koordinasiya işlərinin burada davam etdiriləcəyini bildirib.

Zelenski həmçinin Böyük Britaniyanın Rusiyanın neft sektoruna qarşı yeni sanksiyalar paketi elan etdiyini qeyd edib. Böyük Britaniyanın Rusiyanın bütün ən böyük neft istehsalçılarına sanksiya tətbiq edən ilk ölkə olduğunu bildirən Zelenski, bu qərarın Rusiyanın müharibəni maliyyələşdirmək üçün istifadə etdiyi resursların məhdudlaşdırılması istiqamətində mühüm addım olduğunu vurğulayıb.