Azərbaycan News Agency

CCTV-nin məlumatına görə, Kanada, Danimarka, Finlandiya, Fransa, İslandiya, Yaponiya, Norveç, İsveç, İsveçrə və Böyük Britaniyanın xarici işlər nazirləri çərşənbə axşamı yayımladıqları birgə bəyanatda Qəzzadakı humanitar böhranın miqyasından dərin narahatlıqlarını ifadə ediblər.

Böyük Britaniyanın Xarici İşlər Nazirliyi tərəfindən paylaşılan açıqlamada qış şəraitinin ağırlaşması ilə bölgədəki mülki əhalinin şaxtalı soyuq və güclü yağışlar altında yaşamaq uğrunda mübarizə apardığı vurğulanıb.

Bəyanatda Qəzzadakı mülki şəxslərin ərzaq və səhiyyə müəssisələrinə çıxışda ciddi çətinliklərlə üzləşdiyi qeyd olunaraq İsrail hökumətinə çağırışlar edilib.

İsrailə yönələn tələblər arasında sərhəd keçidlərinin humanitar yardım axını üçün açılması və ikili təyinat bəhanəsi ilə məhdudlaşdırılan məhsullar üzərindəki maneələrin aradan qaldırılması yer alır.

Fələstin hökuməti Ramallahda verdiyi son açıqlamada isə Qəzza sakinlərini fırtına və soyuqdan qorumaq üçün mobil evlərin və sığınacaq materiallarının bölgəyə girişinə icazə verilməsini istəyib.