Azərbaycan News Agency

ABŞ Federal Aviasiya Administrasiyası (FAA) hava hərəkətini idarəetmə mərkəzlərinə təsir edən rabitə problemi səbəbindən ölkə üzrə bütün hava limanlarında təyyarələrin havaya qalxmasını növbəti bildirişədək dayandırıb.

ABŞ-nin nəqliyyat naziri Şon Daffi sosial media hesabında paylaşdığı açıqlamada FAA-nın ölkənin bütün hava limanlarını əhatə edən uçuşların dayandırılması barədə qərar qəbul etdiyini bildirib.

Daffi bütün hava hərəkətini idarəetmə mərkəzlərinə təsir göstərən rabitə probleminin yarandığını qeyd edərək, FAA mütəxəssislərinin problemi araşdırdığını bildirib. O, vəziyyətlə bağlı yenilənmiş məlumatların paylaşılacağını əlavə edib.

FAA-nın qərarının ölkə üzrə bütün təyyarə qalxışlarını əhatə etdiyi, artıq havada olan təyyarələrin isə uçuşlarını davam etdirə bildiyi bildirilib. Beynəlxalq uçuşların isə hər bir hal üzrə ayrıca qiymətləndiriləcəyi qeyd olunub.