Azərbaycan News Agency

Pakistan Xarici İşlər Nazirliyinin açıqlamasına görə, BMT Təhlükəsizlik Şurası Pakistanın təşəbbüsü ilə hazırlanmış “Aktiv münaqişələr zamanı diplomatiyanın rolu” adlı sədr bəyanatını yekdilliklə qəbul edib.

Bəyanatın qəbulu Pakistanın beynəlxalq sülh və təhlükəsizlik sahəsində Şuranın fəaliyyətinə verdiyi töhfə kimi qiymətləndirilib. Mətndə münaqişələr başladıqdan sonra da vasitəçilik, xoşməramlı səylər və kommunikasiya kanallarının açıq saxlanılması daxil olmaqla diplomatik təmasların davam etdirilməsinin zəruriliyi vurğulanıb.

2025-ci ilin iyulunda Pakistanın BMT Təhlükəsizlik Şurasına sədrliyi dövründə yekdilliklə qəbul edilmiş 2788 saylı qətnaməyə əsaslanan bəyanatda münaqişənin bütün mərhələlərində diplomatik səylərin davam etdirilməsinin vacibliyi qeyd olunub.

Bəyanatın müxtəlif münaqişə vəziyyətlərindən əldə edilən təcrübələri və mövcud prinsipləri vahid tematik çərçivədə birləşdirərək Şuranın fəaliyyətinə mühüm töhfə verdiyi bildirilib. Mətnin gərginliyin azaldılması, dialoqun asanlaşdırılması və sülh yolu ilə davamlı siyasi həllərin irəli aparılması istiqamətində Şuranın fəaliyyəti üçün ortaq siyasi istinad nöqtəsi yaratdığı qeyd edilib.

Pakistanın bəyanatın qəbulu ilə çoxtərəfliliyə, dialoqa və diplomatiyaya sadiqliyini davam etdirdiyi, beynəlxalq sülh və təhlükəsizliyin qorunmasına konstruktiv töhfə verdiyi ifadə olunub.