Azərbaycan News Agency

Efiopiyanın Baş naziri Abiy Əhməd Əli Antalyada keçirilən BMT-nin İqlim Dəyişmələri Konfransında (COP31) çıxışı zamanı ev sahibliyinə görə Türkiyəyə təşəkkür edərək ölkəsinin yaşıl inkişaf təşəbbüslərini və COP32 ilə bağlı baxışlarını təqdim edib.

Türkiyə hökumətinə və xalqına səmimi qarşılanmaya görə minnətdarlığını bildirən Abiy Əhməd Əli vurğulayıb ki, Efiopiya üçün iqlim fəaliyyəti yalnız ekoloji məsələ deyil, həm də insanların dolanışıq vasitələrini və iqtisadi inkişafı qoruyan əsas siyasətdir. Efiopiyanın Baş naziri ölkəsində tətbiq olunan "Medemer" fəlsəfəsinə uyğun olaraq Yaşıl İrs Təşəbbüsü çərçivəsində 56 milyard ting əkildiyini bildirib. O, bərpa olunan enerji, dayanıqlı şəhərləşmə və ağıllı iqlim həlləri sahələrində mühüm irəliləyişlər əldə edildiyini qeyd edib.

İqlim dəyişikliyi ilə mübarizədə yalnız vədlərlə kifayətlənməyin doğru olmadığını vurğulayan Abiy Əhməd Əli əlçatan iqlim maliyyələşdirilməsi, qabaqcıl erkən xəbərdarlıq sistemləri və həssas icmaların dayanıqlığını artıracaq investisiyalarla dəstəklənən konkret addımların sürətlə atılmasına çağırıb.

Növbəti Birləşmiş Millətlər Təşkilatının İqlim Dəyişmələri Konfransına (COP32) Efiopiyanın sədrlik edəcəyini xatırladan Abiy Əhməd Əli uğurlu sammit prosesinin təmin olunması üçün COP31-ə sədrlik edən Türkiyə ilə yaxın əməkdaşlığı davam etdirəcəklərini bildirib və bütün dünyanı COP32 üçün Efiopiyaya dəvət edib.