Azərbaycan News Agency

CCTV-nin məlumatına görə, Ərəb Liqası bazar günü Misirin paytaxtı Qahirədə təcili iclas keçirərək İsrailin Somalilandı müstəqil dövlət kimi tanımasını pisləyib.

Ərəb Liqası bildirib ki, İsrailin bu qərarı Somalinin daxili işlərinə müdaxilə deməkdir və ölkənin suverenliyinə və ərazi bütövlüyünə zərər vurur.

Bəyanatda bu addımın Afrika Buynuzu, Qırmızı dəniz və Aden körfəzi başda olmaqla regional sülh və təhlükəsizliyə təhdid yaradacağı barədə xəbərdarlıq edilib.

Birləşmiş Ərəb Əmirliklərinin Ərəb Liqası yanında daimi nümayəndəsi Həməd Ubeyd Əl-Zaabi təcili iclasa sürətli reaksiya verilməsini alqışlayaraq bildirib: “Somalinin təhlükəsizliyini, sabitliyini, suverenliyini və ərazi bütövlüyünü dəstəkləyən hər bir addımı qeyd-şərtsiz dəstəkləyirik”.

Şənbə günü Misir ərəb və islam ölkələri də daxil olmaqla 21 ölkənin xarici işlər nazirləri adından İsrailin qərarını rədd edən birgə bəyanat yayımlamışdı. 20-dən çox ölkə və beynəlxalq təşkilat da Somalinin suverenliyinə dəstək verdiklərini bildirərək İsraili pisləyib.