Azərbaycan News Agency

Fələstin Xarici İşlər Nazirliyi İsrailin Qəzza zolağı və İordan çayının qərb sahilindəki fəaliyyətləri ilə bağlı açıqlama yayıb. Nazirlik İsrailin Fələstin xalqına qarşı hücumlarının və hüquq pozuntularının davam etdiyini bildirərək, beynəlxalq ictimaiyyəti tədbirlər görməyə çağırıb.

Açıqlamada İordan çayının qərb sahilinin şimalındakı Cenin və Tulkərmdə didərgin düşmüş fələstinlilərin sayının artdığı, 300-dən çox ailənin evlərindən çıxarıldığı və bunun ciddi humanitar, sosial və iqtisadi nəticələrə səbəb olduğu qeyd edilib.

Nazirlik İsrailin Fələstin xalqına və onun rəhbərliyinə qarşı təzyiqlərinin artdığını, fələstinlilərin milli hüquqlarını hədəf alan cəhdlərin davam etdiyini bildirib. Açıqlamada həmçinin Qəzzada davam edən hücumlar və humanitar fəlakət qarşısında beynəlxalq ictimaiyyətin öz öhdəliklərini yerinə yetirməsinin vacibliyi vurğulanıb.

Fələstin Xarici İşlər Nazirliyi fələstinlilərə qarşı məskunlaşanların hücumlarının artmasına diqqət çəkərək, bu hücumların işğal siyasəti ilə əlaqəli olduğunu qeyd edib. Nazirlik Şərqi Qüdsdə fələstinlilərin mövcudluğunu hədəf alan tədbirlərin də davam etdiyini bildirib.

Açıqlamada Birləşmiş Millətlər Təşkilatının Yaxın Şərqdəki Fələstinli Qaçqınlara Yardım və İşlərin Təşkili Agentliyinin (UNRWA) hədəf alınması və səlahiyyətlərinin məhdudlaşdırılması cəhdləri də tənqid edilib. Nazirlik fələstinlilərin qorunması, hücumların dayandırılması və beynəlxalq hüquqa riayət olunması üçün beynəlxalq ictimaiyyəti təcili və konkret addımlar atmağa bir daha çağırıb.