Azərbaycan News Agency

İsrail Müdafiə Qüvvələri (IDF) Qəzza zolağında keçirilən əməliyyatlar zamanı HƏMAS-ın hərbi qanadının iki üzvünün zərərsizləşdirildiyini açıqlayıb.

IDF-nin sosial media hesabında yayımlanan açıqlamada bildirilib ki, Qəzza zolağının cənubuna endirilən hava zərbəsi zamanı HƏMAS-ın "Nuxba" bölməsinin rəhbərlərindən olduğu bildirilən Salem Camal Əbdürrəhman Əbu Ləbd hədəfə alınıb.

Açıqlamada Əbu Ləbdin 7 oktyabr 2023-cü il hücumları zamanı Nir Oz kibbutsuna hücumda iştirak etdiyi iddia olunub.

IDF həmçinin həftəsonu Qəzza zolağının mərkəzində keçirilən ayrı əməliyyatda HƏMAS-ın Muazzi batalyonunun komandiri olduğu bildirilən Məhəmməd Əbdünnasir Məhəmməd Xətibin də zərərsizləşdirildiyini açıqlayıb.

IDF iddia edib ki, hər iki şəxs HƏMAS-ın hərbi qanadında fəaliyyət göstərib və İsrail qüvvələrinə qarşı hücumlar planlaşdırıb. Bildirilib ki, onlar "təhdidi aradan qaldırmaq məqsədilə" həyata keçirilən dəqiq hava zərbələri ilə zərərsizləşdiriliblər.

Açıqlamada əlavə olunub ki, İsrail ordusunun Cənub Komandanlığına bağlı bölmələr mövcud razılaşmalar çərçivəsində bölgədə fəaliyyətini davam etdirir. "Bütün təhdidləri aradan qaldırmaq üçün əməliyyatlarımızı davam etdirəcəyik", - deyə bildirilib.