Azərbaycan News Agency

İsrail Müdafiə Qüvvələri (İDF) Yehuda Briqadasının məsuliyyət zonasında yerləşən Susya yaşayış məntəqəsi yaxınlığında baş vermiş hadisə ilə bağlı açıqlama yayıb.

İDF-nin açıqlamasında bildirilir ki, bölgədə atəş açıldığı barədə məlumatlardan sonra araşdırma başlanılıb və hadisənin silahlı hücum olmadığı müəyyən edilib.

Açıqlamaya görə, israilli mülki şəxslərlə fələstinlilər arasında şiddətli qarşıdurma baş verib və tərəflər bir-birinə daş atıblar.

Hadisənin davamında ordunun "terrorçu" kimi xarakterizə etdiyi bir nəfər mülki şəxsin silahını ələ keçirib və bölgədə havaya atəş açılıb.

Daşlı hücum zamanı bir israilli mülki şəxsin yaralandığı, onun müalicə üçün ərazidən təxliyə edildiyi bildirilib.

İDF silahı ələ keçirən şübhəlinin saxlanılması üçün əməliyyata başladığını, təhlükəsizlik qüvvələrinin axtarışları davam etdirdiyini və ərazidə mühasirə tədbirlərinin tətbiq olunduğunu açıqlayıb.