Azərbaycan News Agency

CCTV-nin məlumatına görə, Səudiyyə Ərəbistanının rəhbərlik etdiyi koalisiya Yəmənin Qırmızı dəniz sahilində yerləşən Hudeydə vilayətində husilərin nəzarətində olan hərbi hədəflərə hava zərbələri endirdiyini bildirib.

Koalisiyanın Birləşmiş Qüvvələr Komandanlığının bəyanatında əməliyyatın husilərin Qırmızı dənizdə ticarət gəmilərinə qarşı hücumlarına cavab olaraq həyata keçirildiyi qeyd olunub.

Koalisiyanın sözçüsü Türki Əl-Maliki husiləri dünyanın ən mühüm dəniz ticarəti yollarından biri olan Qırmızı dənizdə gəmiçilik təhlükəsizliyini təhdid etməkdə ittiham edərək bildirib ki, son əməliyyat Hudeydə limanını hədəf almayıb və Yəməndəki bütün limanlar fəaliyyətini normal şəkildə davam etdirir.

Digər tərəfdən, husilərə bağlı Al-Masirah telekanalı Səudiyyə Ərəbistanının hücumlarında Qırmızı dənizdəki Kamaran adasının və Hudeydədəki telekommunikasiya obyektlərinin hədəf alındığını iddia edib.

Yəmənin rəsmi Saba Xəbər Agentliyi isə həmin gün Səudiyyə Ərəbistanının cənubundakı müxtəlif bölgələrin hücuma məruz qaldığını bildirib. Agentliyin yayımladığı görüntülərdə hücumlardan sonra bölgədən qalın tüstünün yüksəldiyi müşahidə olunub.

Səudiyyə Ərəbistanının Mülki Müdafiə qurumları da liman şəhəri Yanbu sakinləri üçün şənbə günü "mümkün təhlükə" xəbərdarlığı yayımlayıb. Təhlükə aradan qalxdıqdan sonra xəbərdarlığın ləğv edildiyi açıqlanıb.

Husilərin rəhbərliyi bazar ertəsi günü Səudiyyə Ərəbistanına məxsus dəniz daşımalarına qarşı dəniz blokadası tətbiq edəcəyini elan etmiş və Səudiyyə limanları ilə əlaqəli beynəlxalq dəniz ticarətinin də hədəfə çevrilə biləcəyi barədə xəbərdarlıq etmişdi.

Husilər həmçinin cümə axşamı Qırmızı dənizdə üzən iki Səudiyyə neft tankerinə daşımalara qoyulan məhdudiyyətləri pozduqları iddiası ilə raket və pilotsuz uçuş aparatları vasitəsilə hücum etdiklərini bildiriblər.