Azərbaycan News Agency

CCTV-nin məlumatına görə, İran Xarici İşlər Nazirliyinin sözçüsü İsmayıl Bəqai Hörmüz boğazının bağlı olduğunu və İranla Oman arasında su yolu ilə bağlı danışıqların müsbət irəlilədiyini bildirib.

Bəqai tərəflər arasında əlaqələrin davam etdiyini qeyd edərək, danışıqların yalnız İran və Oman arasında ikitərəfli məsələ olduğunu, prosesin ABŞ ilə heç bir əlaqəsinin olmadığını vurğulayıb.

Fars agentliyinin rəsmi mənbələrə istinadən yaydığı məlumata görə, altı gəmi bazar ertəsi səhər tezdən naviqasiya və mövqe müəyyənləşdirmə sistemlərini söndürərək Hörmüz boğazının cənub kanalından keçməyə cəhd edib.

İran rəsmiləri bu marşrutu "qanunsuz və təhlükəli" adlandıraraq, gəmilərdən birinin qəzaya uğradığını, digər beş gəminin isə yenidən Fars körfəzinə istiqamətləndirildiyini bildiriblər.

Məlumatda həmçinin gəmilərin keçid cəhdinin ABŞ ordusunun təhriki ilə həyata keçirildiyi iddia olunub.

İran rəsmiləri bəyan ediblər ki, Hörmüz boğazından bütün keçidlər İranın müəyyən etdiyi dəniz marşrutları ilə həyata keçirilməlidir və alternativ marşrutların ciddi təhlükəsizlik riskləri yaratdığı barədə xəbərdarlıq ediblər.