Azərbaycan News Agency

CCTV-nin məlumatına görə, İsrail ordusu işğal altındakı İordan çayının qərb sahilində genişmiqyaslı hücumlar, evlərə basqınlar və məcburi köçürmə tədbirləri ilə əməliyyatlarını fasiləsiz davam etdirir.

Fələstinin rəsmi WAFA xəbər agentliyinin yaydığı məlumata görə, cümə günündən bəri Əl-Xəlil şəhərində həyata keçirilən əməliyyatlar çərçivəsində təxminən 1500 fələstinli evlərini tərk etməyə məcbur edilib.

Agentlik qarşıdakı saatlarda daha 2500 nəfərin məcburi köçürülməsinin planlaşdırıldığını açıqlayıb. Həmçinin İsrail bölmələrinin Əl-Xəlili ətraf qəsəbələr, kəndlər və qaçqın düşərgələri ilə birləşdirən əsas yolları torpaq yığınları və beton bloklarla bağladığı bildirilib.

Digər tərəfdən, İordan çayının qərb sahilində Nablus və Ramallah şəhərləri yaxınlığında zeytun yığımı ilə məşğul olan fələstinlilər İsrail əsgərlərinin və yəhudi məskunlaşanların hücumuna məruz qalıblar. Hücumlar nəticəsində çox sayda fələstinli yaralanıb, zeytun ağaclarına və fələstinlilərə məxsus əmlaka ziyan dəyib.