Azərbaycan News Agency

Hammak The Wall Street Journal-a müsahibəsində deyib ki, FED ən azı yaza qədər hazırda 3,5–3,75 faiz aralığında olan əsas faiz dərəcəsini dəyişməyə ehtiyac duymur. O əlavə edib ki, yüksək inflyasiyadan daha çox narahat olduğu üçün son faiz endirimlərinə qarşı çıxıb.

Hammak qeyd edib ki, həmin vaxta qədər ABŞ Prezidenti Donald Trampın tətbiq etdiyi gömrük rüsumlarının tədarük zənciri tərəfindən necə mənimsənildiyini və son dövrdə mal qiymətləri inflyasiyasının zəifləyib-zəifləmədiyini daha yaxşı qiymətləndirmək mümkün olacaq.

O bildirib ki, noyabr ayında istehlak qiymətləri indeksinin 2,7 faiz olması məlumat təhrifləri səbəbindən 12 aylıq qiymət artımını ehtimal ki, real göstəricidən aşağı göstərir.

İnflyasiya narahatlıqlarına toxunan Hammak deyib: “Əsas ssenarim ondan ibarətdir ki, inflyasiyanın hədəfə qayıtdığına və ya əmək bazarının daha ciddi şəkildə zəiflədiyinə dair daha aydın sübutlar əldə olunana qədər bir müddət bu səviyyədə qala bilərik.”

Bu ayın əvvəlində Sinsinnatidə keçirilən tədbirdə çıxış edən Hammak bildirib ki, yüksək inflyasiyaya diqqət yetirmək istəyir və daha sərt pul siyasətinə üstünlük verir. O, gələn il pul siyasəti və faiz dərəcələri ilə bağlı əsas qərarlara nəzarət edən Federal Açıq Bazar Komitəsinin (FOMC) səsvermə hüquqlu üzvü olacaq.