Azərbaycan News Agency

Fransa Prezidenti Emmanuel Makron Yaxın Şərqdəki cari hadisələrlə bağlı Səudiyyə Ərəbistanının vəliəhdi Məhəmməd bin Salman ilə telefon danışığı aparıb.

Danışığın əsas mövzusunun regional münaqişələr olduğunu bildirən Makron deyib: “Atəşkəsə tam şəkildə hörmət olunması və onun gecikmədən Livana da şamil edilməsi ilə bağlı dəstəyimi bir daha ifadə etdim”.

Dəniz təhlükəsizliyi və enerji marşrutları ilə bağlı qiymətləndirmələr edən Makron bildirib: “Hörmüz boğazında tam mənada azad və təhlükəsiz gəmiçiliyin mümkün olan ən qısa müddətdə yenidən təmin olunması məsələsini müzakirə etdik”.

Diplomatik prosesin davamlılığına diqqət çəkən Makron bunları qeyd edib:

“İslamabaddakı danışıqlar hələ yenicə başladığı üçün, gərginliyin azaldılmasına, gəmiçilik azadlığına və bölgədə davamlı sülh və təhlükəsizliyi təmin edəcək sazişin yekunlaşdırılmasına töhfə vermək məqsədilə yaxın təmasda qalmaq barədə razılaşdıq”.