Azərbaycan News Agency

Monteneqro Prezidenti Yakov Milatoviç COP31 sammiti çərçivəsində Lixtenşteyn Şahzadəsi Alois ilə görüşüb. Görüşdə Monteneqronun Avropa gələcəyi, ikitərəfli münasibətlərin gücləndirilməsi və iqtisadi əməkdaşlığın inkişaf etdirilməsi imkanları qiymətləndirilib.

Milatoviç Monteneqronun Aİ-yə üzvlük danışıqlarında əldə etdiyi irəliləyişlər barədə məlumat verdiyini və ölkəsinin 2028-ci ildə Avropa İttifaqının 28-ci üzvü olmaq hədəfinə sadiqliyini ifadə etdiyini bildirib.

İki ölkə arasında əməkdaşlığın əsas istiqamətləri kimi investisiyaların cəlb edilməsi, dayanıqlı inkişaf, turizm və təcrübə mübadiləsinin ön plana çıxdığını qeyd edən Milatoviç ikiqat vergitutmanın qarşısının alınması haqqında sazişin qüvvəyə minməsinin iqtisadi münasibətlər üçün yeni imkanlar yaratdığını vurğulayıb.

Görüşdə kiçik dövlətlərin ticarət palataları arasında mümkün əməkdaşlıq sazişi də müzakirə olunub. Milatoviç gələn ilin birinci yarısında Şahzadə Aloisi Monteneqroda qəbul etməyə ümid etdiyini bildirərək, dialoqun davam etdirilməsinin iki ölkə arasındakı dostluq münasibətlərinə töhfə verəcəyini qeyd edib.