Azərbaycan News Agency

Ukrayna Prezidenti Volodimir Zelenski Rusiyanın hücumlarından sonra ölkənin müxtəlif bölgələrində enerji vəziyyətini müzakirə etmək üçün koordinasiya görüşü keçirdiyini açıqlayıb. Görüşdə enerji avadanlıqları, texnika və tələb olunan dəstək tədbirləri ilə bağlı məlumatların yeniləndiyini bildirən Zelenski bu ehtiyacların İrlandiyadakı görüşləri zamanı avropalı tərəfdaşlarla müzakirə ediləcəyini qeyd edib.

Dnepropetrovsk, Odessa və Donetsk bölgələrində aparılan təmir işləri barədə məlumat aldıqlarını bildirən Zelenski Kramatorskdakı vəziyyətlə bağlı məsələlərin də qiymətləndirildiyini açıqlayıb. Zelenski həmçinin hökumət rəsmilərinə Milli Təhlükəsizlik və Müdafiə Şurası və Prezident Administrasiyasının komandası ilə əməkdaşlıq çərçivəsində bölgələrdə istilik təchizatı xidmətləri və avadanlıqların mövcudluğu barədə məlumatların yoxlanılması tapşırığını verib.

Baş nazirin Kiyevdə alternativ nəqliyyat marşrutları ilə bağlı qərarların icrası haqqında məlumat təqdim etdiyini bildirən Zelenski Ukrayna Hərbi Hava Qüvvələrinin komandanı ilə də elektrik enerjisinin paylanması və ötürülməsi obyektlərinin, eləcə də logistika mərkəzlərinin mühafizə ehtiyaclarını müzakirə etdiklərini qeyd edib.

Zelenski verilən tapşırıqların 24 saat ərzində tamamlanmasını tələb edib.