Azərbaycan News Agency

Macarıstanın Baş naziri Viktor Orban Ukraynaya planlaşdırılan uzunmüddətli maliyyə yardımlarının Macarıstan xalqı üzərində mümkün iqtisadi təsirləri ilə bağlı açıqlama verib.

Yardımın həcminə və Macarıstanın payına diqqət çəkən Orban deyib: “Təəssüf ki, pul ağacda bitmir, xüsusən də 800 milyard dollar. Ukraynalılar bu məbləği qarşıdakı 10 il üçün avropalılardan tələb edirlər. Macarıstan üçün bu, 9 milyard dollardan çox maliyyə yükü deməkdir”.

Brüsselin bu xərci qarşılamaq üçün təklif etdiyi üsulların Macarıstandakı sosial dövlət modelini təhdid etdiyini bildirən Orban əlavə edib: “Bəs Brüsselə görə bütün bu pul haradan gələcək? Tam siyahını təqdim etdiyimi iddia etmədən deyim ki, 13-cü və 14-cü ay pensiyaları, mənzil dəstək proqramları, ailə mənzili alınmasına subsidiyalar, ev təsərrüfatları üçün endirimli enerji qiymətləri, sabit gəlir vergisi, işçi kredit proqramı və analar, gənclər və ailələr üçün vergi güzəştləri ləğv edilərdi”.

Orban vurğulayıb: “Bu, spekulyasiya deyil. Brüsselin əsas planı Avropa Semestri çərçivəsində, ölkəyə xas tövsiyələrdə və pozuntu prosedurlarında açıq və aydın şəkildə göstərilib”.

Yaxınlaşan seçkilər ərəfəsində xalqın qərar verməli olduğunu qeyd edən Orban sözlərini belə tamamlayıb: “Macarıstanda seçkilər sürətlə yaxınlaşarkən qərar qəbul edilməlidir. Bir şey dəqiqdir: Brüsselin müharibə planına yox deyirik”.