Pakistandakı yanğında həlak olanların sayı 60-a yüksəldi
Pakistanın Kəraçi şəhərində ticarət mərkəzində baş verən yanğında həyatını itirənlərin sayı 60-a çatıb.
CCTV-nin məlumatına görə, Pakistanın cənubundakı liman şəhəri Kəraçidə ticarət mərkəzində baş verən yanğından sonra həlak olanların sayı 60-a yüksəlib. Rəsmilər çoxmərtəbəli binadakı bir mağazadan azı 30 cəsədin çıxarıldığını bildiriblər.
Polis rəsmisi Syed Asad Raza cəsədlərin ticarət mərkəzinin asma mərtəbəsində tapıldığını bildirərək, çox sayda insanın hələ də itkin düşdüyünü və axtarış-xilasetmə işlərinin davam etdiyini deyib.
Raza xilasetmə əməliyyatlarının ən müasir texnikadan istifadə edilməklə aparıldığını və binanın uçmuş hissələrindəki dağıntıların təmizləndiyini qeyd edib.
Rəsminin sözlərinə görə, zədələnmiş binanın daxilində sıx tüstü və son dərəcə yüksək temperatur səbəbindən xilasetmə qrupları bəzi ərazilərə çatmaqda çətinlik çəkirlər. O əlavə edib ki, binanın bir hissəsi tamamilə boşaldılıb, digər iki hissədə isə dağıntılar altında qalanların xilas edilməsi üçün axtarış işləri davam edir.
Facebook
Tweeter
Whatsapp
