Azərbaycan News Agency

ABŞ Prezidenti Donald Trampın çıxışından bəzi əsas məqamlar:

“Qəzzadakı müharibə və əlbəttə ki, hazırda sona çatır. Yaxın Şərqdə 59 ölkə bu prosesin içində oldu. Və çoxları dedi ki, HƏMAS sözünü tutmasa — çox güman ki, tutacaqlar — amma bunlar sözün əsl mənasında doğulan kimi əlinə silah verilmiş qruplardır, buna baxmayaraq silahlarını yerə qoymalıdırlar. Silahlarını yerə qoymasalar, bu onların sonu olar.

Bir çox ölkə gəlib mənə dedi ki, gedib bunu etmək istəyirik. Və ənənəvi olaraq bu hadisə ilə bağlı olan ölkələr də, əlbəttə, bunları dedi. Amma burada yanğınların ardı-arası kəsilmir, məsələn, Livandakı Hizbullah. O məsələ ilə bağlı da nəsə edəcəyik. Amma mən onlara qalıntılar deyirəm, çünki keçmişdə çox böyük, son dərəcə güclü ölkələrin bir-biri ilə toqquşduğu mühitdən danışırıq.

Əlbəttə, bununla yanaşı, iyun ayında İranın nüvə zənginləşdirmə qabiliyyətini gecəyarısı “Balyoz” əməliyyatı ilə aradan qaldırdıq. İran indi danışıqlar aparmaq istəyir və biz danışacağıq.

Eyni şəkildə Suriyada İŞİD-i vurduq. Bilirsiniz, birinci dönəmimdə də bunu etmişdik. İkinci dönəmimdə birinci dönəmimdən də daha uğurlu olduğumu deməliyəm. İŞİD-i aradan qaldırdıq. Tamamilə aradan qaldırmışdıq, amma Bayden administrasiyasında yenidən ortaya çıxmağa başladılar. Bu arada Suriya Prezidenti ilə də danışdım, çox böyük irəliləyiş var. Buna görə də çox məmnunuq. Bütün sanksiyaları ləğv etdik. Bu da onlara nəfəs almaq fürsəti verəcək.

Avropaya və Amerikaya yönələn təhdidlər, Yaxın Şərqə yönələn təhdidlər və başqa yerlərə yönələn təhdidlər sakitləşməyə başlayıb. Cəmi bir il əvvələ nisbətən çox fərqlidir; bir il əvvəl dünya, açığı, alov içində idi və bir çox insan bunun fərqində deyildi. Nigeriyada terrorçular xristianları öldürürdülər, onları da vurduq. Minlərlə xristianı öldürdülər. İnsan düşünür ki, bu nəyin üstündədir. Bunların çoxu və bütün bu uğur, birinci dönəmimdə ABŞ silahlı qüvvələrini gücləndirməyim sayəsində oldu. İndi isə 1 trilyon dollardan çox büdcə ilə hər zamankindən daha güclüyük.

NATO müttəfiqlərinin demək olar ki, hamısından müdafiə xərclərini 5 faizə qaldırmaq barədə söz aldım — İspaniyadan başqa hamısından. İspaniyanın niyə bunu etmədiyini, doğrusu, mən də başa düşmürəm. Bunu İspaniya ilə müzakirə etməli olacağıq.

ABŞ-ın təhlükəsizliyimizə və Qərb yarımkürəsinin təhlükəsizliyinə sadiqliyi də ön plandadır. Cənub sərhədimizi terror təşkilatlarına, kartellərə, ölkəmizə girmək istəyən hər cür cinayətkara bağladım və ölkəmizə dəniz yolu ilə daxil olan narkotiki demək olar ki, 100 faiz bağladıq. Quru yolu ilə bunu etmək asan idi. Amma su yolu ilə, dəniz yolu ilə bunu etmək həqiqətən çətin idi. Dünən aldığım son məlumata görə, 98,1 faizini dayandırdıq.

Sülh Şurası həqiqətən də çox önəmli dünya liderlərindən ibarətdir. Keçən oktyabrda Qəzzadakı münaqişəni daimi olaraq bitirmək üçün planımızı açıqlamışdıq. Və xatırlatmaq istəyirəm ki, vizyonumuz ötən il BMT Təhlükəsizlik Şurası tərəfindən yekdilliklə qəbul edilib. Bu planın birinci mərhələsi çərçivəsində, əlbəttə ki, Qəzzada sülhü və atəşkəsi davam etdirəcəyik.

Biz Qəzzanın silahsızlaşdırılmasını, düzgün idarə olunmasını və gözəl şəkildə yenidən qurulmasını istəyirik. Sülh Şurası da artıq bu düşüncə ilə başladı. Qəzzada uğur qazansaq, başqa mövzulara da keçə bilərik. Qəzzada çox uğurlu olacağıq.

Sülh Şurası yaradıldıqdan sonra bir çox fərqli şey edə bilərik. Bunu BMT ilə koordinasiya daxilində də edə bilərik. Mən həmişə deyirəm, BMT-nin çox böyük potensialı var. Amma bundan istifadə etmir.”