Azərbaycan News Agency

Qazaxıstanın xarici işlər naziri Yermek Koşerbayev Səudiyyə Ərəbistanı Krallığına rəsmi səfər edib.

Səfər çərçivəsində Koşerbayev Səudiyyə Ərəbistanının xarici işlər naziri şahzadə Faysal bin Fərhan Al Səud ilə danışıqlar aparıb. Tərəflər siyasi dialoqun gücləndirilməsi, ticarət-iqtisadi və investisiya əməkdaşlığının genişləndirilməsi, eləcə də mədəni-humanitar əlaqələrin dərinləşdirilməsi məsələlərini müzakirə ediblər.

Danışıqlarda ikitərəfli münasibətlərin qarşılıqlı hörmət və etimad əsasında inkişaf etdiyi vurğulanıb, razılaşmaların hüquqi bazasının gücləndirilməsinin və əməkdaşlığın konkret layihələrlə dəstəklənməsinin zəruriliyi qeyd olunub.

Regional və qlobal məsələlər də gündəmdə olub, BMT, İƏT, AİGK və OPEC+ çərçivəsində koordinasiyanın əhəmiyyəti bildirilib. Tərəflər beynəlxalq məsələlərdə sıx koordinasiyanın davam etdirilməsi barədə razılığa gəliblər.

Səfər çərçivəsində Koşerbayev enerji və investisiya sahələrində də görüşlər keçirərək, Səudiyyə rəsmiləri ilə ənənəvi və bərpa olunan enerji layihələri, həmçinin “yaşıl” transformasiya sahəsində əməkdaşlıq imkanlarını müzakirə edib.

Səfərin sonunda iki ölkə arasında İnvestisiyaların təşviqi və qarşılıqlı qorunmasına dair saziş və Koordinasiya Şurasının yaradılması haqqında hökumətlərarası sazişlər imzalanıb.