Azərbaycan News Agency

Qətər Xarici İşlər Nazirliyi bildirib ki, Qətərin Baş naziri və xarici işlər naziri Şeyx Məhəmməd bin Əbdürrəhman bin Casim Al-Tani Omanın xarici işlər naziri Bədr bin Həməd bin Həmud Albusaidi ilə telefon danışığı aparıb.

Telefon danışığı zamanı iki ölkə arasındakı ikitərəfli münasibətlər və onların inkişaf etdirilməsi istiqamətində atılacaq addımlar, həmçinin regiondakı son hadisələr, gərginliyin azaldılmasına yönəlmiş diplomatik təşəbbüslər və birgə koordinasiya məsələləri müzakirə olunub.

Al-Tani bütün tərəflərin dialoq və diplomatiyaya sadiq qalmasının vacibliyini vurğulayaraq, ABŞ ilə İran arasında imzalanmış anlaşma memorandumunun müddəalarının icrasının, Hörmüz boğazında gəmiçilik azadlığının qorunmasının, regional təhlükəsizlik və sabitliyin möhkəmləndirilməsinin zəruri olduğunu bildirib.

Al-Tani həmçinin Qətərin regionda gərginliyin azaldılması və davamlı sülhün təmin olunmasına yönəlmiş bütün təşəbbüsləri dəstəklədiyini bir daha təsdiqləyib.