Azərbaycan News Agency

Ukraynanın xarici işlər naziri Andriy Sıbiha açıqlamasında Oleşkidən təxliyə edilən vətəndaşların Ukrayna sərhədini keçdiklərini bildirərək, insanların aylarla davam edən aclıq və təcriddən sonra təhlükəsizliyə qovuşduqlarını qeyd edib. O, şəhərdə qalmağı seçən mülki şəxslərə də fasiləsiz humanitar yardımın çatdırılmasının təmin edilməsinin vacibliyini vurğulayıb.

Sıbiha təxliyə əməliyyatında vasitəçilik etdiklərinə görə ABŞ-yə və ABŞ-nin birinci xanımı Melaniya Trampa təşəkkür edib. O bildirib ki, Ukrayna aylardır Birləşmiş Millətlər Təşkilatının Təhlükəsizlik Şurası da daxil olmaqla beynəlxalq platformalarda Oleşkidəki humanitar böhrana diqqət çəkir. Sıbiha həmçinin Papa XIV Leoya, beynəlxalq tərəfdaşlara və əməliyyatın yerində koordinasiyasını həyata keçirən Ukraynanın insan hüquqları üzrə müvəkkili Dmitro Lubinetsə və onun komandasına təşəkkürünü bildirib.

Ukraynanın xoş niyyətlə hərəkət etdiyini və verdiyi sözə əməl etdiyini vurğulayan Sıbiha Oleşkidə əldə olunan nəticələrin etimadın möhkəmləndirilməsi istiqamətində bir addım ola biləcəyini və sülh prosesində yeni irəliləyişlərə zəmin yarada biləcəyini qeyd edib.