Azərbaycan News Agency

İtaliyanın Baş nazirinin müavini və xarici işlər naziri Antonio Tayani sosial media hesabında verdiyi açıqlamada şəxsi məlumatlarının bir neçə gündür qaranlıq internetdə yayıldığını və cinayətkar təşkilatların istifadəsinə açıq olduğunu bildirib. Tayani bu vəziyyətin onu təhdid və qorxutma cəhdlərinə məruz qoyduğunu, ailəsinin də hədəfə alındığını qeyd edib.

Onu təhdidlərlə qorxutmağa çalışanlara boyun əyməyəcəyini vurğulayan Tayani xarici işlər naziri vəzifəsini davam etdirəcəyini, nazirliyin fəaliyyətini və müttəfiqlərlə əməkdaşlığı gücləndirməyə davam edəcəyini bildirib.

Tayani Ukrayna ilə bağlı mövqeyinin hədəfə alınmasının səbəblərindən biri olduğunu qeyd edərək suveren bir dövlətin azadlığını, demokratiyasını və müstəqilliyini müdafiə etməyə davam edəcəyini vurğulayıb.

Xarici İşlər Nazirliyinin informasiya təhlükəsizliyini qorumaq istiqamətində gördüyü işlərə də toxunan Tayani nazirlik daxilində kiberhücumları araşdırmaq üçün 10 nəfərlik qrup yaradıldığını açıqlayıb. O, qrupun dövlət qurumları ilə əlaqəli ola biləcək təşkilatların informasiya sistemlərinə qarşı hücumları araşdırdığını və müttəfiq ölkələrlə koordinasiyalı şəkildə çalışdığını bildirib.

Tayani İtaliyanın təhlükəsizliyini qorumağa və vətəndaşları kibercinayətkarlardan müdafiə etməyə davam edəcəklərini qeyd edərək bu yanaşmanın İtaliya xalqını və ölkəni qorumağın doğru yolu olduğunu ifadə edib.