Azərbaycan News Agency

ABŞ Prezidenti Donald Tramp Davosda keçirilən Dünya İqtisadi Forumunda (WEF) dünya liderlərinə və biznes ictimaiyyətinə müraciət edərək, prezidentliyinin ilk ilini və gələcək baxışını açıqladı. Tramp Biden administrasiyasından miras qalan “staqflyasiya” vəziyyətinin vergi endirimləri, dövlət xərclərinin kəskin azaldılması və gömrük rüsumu siyasəti ilə aradan qaldırıldığını söylədi.

Amerika tarixində ən böyük iqtisadi dönüşün həyata keçirildiyini vurğulayan Tramp belə dedi:

“Amerika tarixinin ən böyük iqtisadi dönüşünü etdik və Biden administrasiyası dövründə ABŞ həqiqətən staqflyasiya ilə üz-üzə idi – aşağı artım və yüksək inflyasiya, bu isə uğursuzluq resepti idi. Ancaq mənim siyasətlərimin cəmi bir ili ərzində bunun tam əksini görürük; demək olar ki, inflyasiya yoxdur. Möhtəşəm iqtisadi artımdan danışırıq. İnanıram ki, çox qısa zamanda görəcəksiniz – indiyədək heç bir ölkənin çatmadığı səviyyələrə çatacağıq. Son üç ayda inflyasiya 1,3 faiz, iqtisadi artım isə 5,4 faiz olub – bu göstəricini məndən başqa çox az adam proqnozlaşdırmışdı. Amerika fond bazarları 52 rekord qırdı; düşünün, bunların hamısı cəmi bir il ərzində baş verdi.”

Tramp iqtisadi göstəricilərlə yanaşı sosial rifah və investisiyalara da toxunaraq dedi: “Prezident olduğumdan bəri 1 milyon 209 min insanı ərzaq yardımından çıxarmışıq. 18 trilyon dollara çatdıq və son rəqəmlər açıqlananda ölkəmizə gələn investisiyalar 20 trilyon dollara çatacaq; bunun tarixdə analoqu yoxdur.”

Avropanın mövcud iqtisadi modelini tənqid edən Tramp çıxışında bunları söylədi: “Avropada bir çox yerləri tanımaq çətindir. Avropanı sevirəm və onun yaxşı olmasını istəyirəm, amma düzgün yolda deyil. İkinci Dünya Müharibəsindən sonra dövlət qulluqçularında ən böyük ixtisarı etdik. Bir il ərzində dövlət büdcəsini 27 faiz azaltdıq. Biden dövrünün rekord xərclərinə son qoyduq. 120-dən çox qaydanı ləğv etdim. Bəxşişlərdən və sosial təminatdan vergini götürdük. Gömrük rüsumları ilə daim artan ticarət kəsirimizi bağladıq. Aylıq ticarət kəsirimizi inflyasiyaya səbəb olmadan 77 faiz azaltdıq.”

Qrenlandın strateji əhəmiyyətinə toxunan Tramp adanın alınması məsələsi ilə bağlı dedi: “Biz Qrenlandı qoruduq və düşmənlərimizin ora yarım addım atmasının qarşısını aldıq. Əgər biz olmasaydıq, hamınız alman və bir az da yapon dilində danışırdınız. Müharibədən sonra Qrenlandı Danimarkaya qaytardıq. İndi həm ölkəmiz, həm də dünya əvvəlkindən daha böyük risklərlə üz-üzədir. Qrenland tamamilə müdafiəsiz, son dərəcə vacib və strateji bir nöqtədir. Biz onu minerallar üçün istəmirik; ehtiyacımızın səbəbi bu deyil, biz onu strateji milli təhlükəsizlik baxımından istəyirik.”

Qrenland məsələsində güc tətbiq etməyəcəyini vurğulayan Tramp əlavə etdi: “Güc tətbiq edəcəyimi düşünürlər; xeyr, etməyəcəyəm. Amerikanın istədiyi tək şey Qrenland adlı bir yerdir. O, artıq bizim əlimizdə idi, amma hörmət əlaməti olaraq Danimarkaya verdik. Qrenland xalqına hörmətim var, liderləri həqiqətən çox yaxşıdır. Bu nəhəng buz parçasını yalnız ABŞ qoruya bilər. Qrenlandın ABŞ tərəfindən alınması ilə bağlı danışıqların yenidən aparılmalı olduğunu deyirəm.”