Azərbaycan News Agency

Tramp Truth Social platformasında paylaşımında deyib: “Dərhal qüvvəyə minməklə, İran İslam Respublikası ilə biznes aparan hər bir ölkə ABŞ ilə bütün əməliyyatlara görə 25 faiz gömrük vergisi ödəyəcək. Bu əmr qəti və yekundur.”

Tramp İranla “biznes aparmaq” anlayışının nəyə aid edildiyini dəqiqləşdirməyib. Bu isə əlavə rüsumların necə tətbiq olunacağı, hansı ölkələrin hədəf alınacağı və yalnız malların deyil, xidmətlərin də daha yüksək vergilərlə üzləşib-üzləşməyəcəyi ilə bağlı suallar doğurub.

Trampın açıqlaması İran’da yüzlərlə insanın həlak olduğu hökumət əleyhinə etirazçıları “xilas etmək” üçün ABŞ hərbi müdaxiləsini gündəmə gətirdiyi bir vaxta təsadüf edib. Cümə axşamı hakimiyyət orqanları tərəfindən tətbiq edilən davamlı rabitə kəsintisi ölkəni böyük ölçüdə xarici aləmdən təcrid edib.

Yeni gömrük vergisi Çindən gələn mallara tətbiq edilən mövcud 20 faizlə müqayisədə ümumilikdə ən azı 45 faiz dərəcə demək ola bilər. Çin gömrük məlumatlarına görə, 2025-ci ilin ilk 11 ayında Çin İrana 6,2 milyard dollar dəyərində mal ixrac edib, 2,85 milyard dollar dəyərində mal idxal edib.

Bu rəqəmlər Çinin açıq şəkildə bəyan etmədiyi neft alışlarını əhatə etmir. Analitiklər son illərdə İran neft ticarətinin 90 faizdən çoxunun vasitəçi ölkələr üzərindən Çin tərəfindən idxal edildiyini təxmin edirlər.

Çinlə yanaşı, Hindistan, Birləşmiş Ərəb Əmirlikləri və Türkiyə də İranın mühüm ticarət tərəfdaşları hesab olunur.