Azərbaycan News Agency

ABŞ Prezidenti Donald Tramp NATO-nun Baş katibi Mark Rutte ilə söhbəti və Qrenlandın strateji əhəmiyyəti barədə açıqlama verib.

Danışığın detalları ilə bağlı Tramp bildirib: “Qrenland mövzusunda NATO-nun Baş katibi Mark Rutte ilə çox yaxşı telefon danışığı apardım. İsveçrənin Davos şəhərində müxtəlif tərəflərin iştirakı ilə görüş keçirilməsi barədə razılığa gəldik.”

Qrenlandın təhlükəsizlik baxımından kritik əhəmiyyətini vurğulayan Tramp deyib: “Hər kəsə çox açıq şəkildə bildirdiyim kimi, Qrenland milli və qlobal təhlükəsizlik üçün zəruridir. Geri dönüş yoxdur və hamı bu mövzuda həmfikirdir.”

ABŞ-ın hərbi gücünə və dünya sülhündəki roluna diqqət çəkən Tramp sözlərini belə tamamlayıb: “Amerika Birləşmiş Ştatları planetin hər yerində açıq fərqlə ən güclü ölkədir. Bunun əsas səbəbi ilk prezidentlik dövrümdə hərbi gücümüzün yenidən qurulmasıdır və bu proses daha da sürətlənir. Biz dünya miqyasında sülhü təmin edə bilən yeganə qüvvəyik və bu, olduqca sadə şəkildə həyata keçirilir.”