Azərbaycan News Agency

BMT-nin İnsan Hüquqları üzrə Ali Komissarı Volker Türk İran üzrə təhlükəsizlik qüvvələrinin etirazçılara qarşı artan zorakılığından dəhşətə gəldiyini bildirərək, yüzlərlə insanın öldürüldüyü və minlərlə insanın saxlanıldığına dair məlumatların daxil olduğunu deyib.

Türk İran hakimiyyətini dinc etirazçılara qarşı hər cür zorakılığı və təzyiqi dərhal dayandırmağa, internet və telekommunikasiya xidmətlərinə tam çıxışı bərpa etməyə çağırıb, eyni zamanda ciddi pozuntulara görə məsuliyyət daşıyanların cavab verməli olduğunu vurğulayaraq bildirib: “Dinc nümayişçilərin öldürülməsi dayandırılmalıdır və etirazçıların ‘terrorçu’ kimi damğalanaraq onlara qarşı zorakılıq tətbiq edilməsi qəbuledilməzdir”.

Bu zorakılıq dövrünün davam edə bilməyəcəyini qeyd edən Türk deyib: “İran xalqının ədalət, bərabərlik və ədalətlilik tələbləri eşidilməlidir. İranlıların dinc şəkildə etiraz etmək hüququ var. Onların şikayətləri dinlənilməli və həll edilməlidir, heç kim tərəfindən alətə çevrilməməlidir”.

Türk əlavə edib ki, bütün qətllər, etirazçılara qarşı zorakılıq və digər insan hüquqları pozuntuları beynəlxalq insan hüquqları norma və standartlarına uyğun şəkildə araşdırılmalı və məsul şəxslər cavab verməlidir.