Azərbaycan News Agency

Ukraynanın Milli Təhlükəsizlik və Müdafiə Şurasının katibi Umerov Ankarada Türkiyənin xarici işlər naziri Fidan ilə görüşüb.

Umerov görüşlə bağlı açıqlamasında bildirib: “Təhlükəsizlik vəziyyətini, danışıqlar proseslərinin gedişatını və atılacaq əlavə addımlar üzrə koordinasiyanı müzakirə etdik. Həmişə olduğu kimi, humanitar mövzulara və xalqımızın geri dönüşü məsələsinə xüsusi önəm verdik.”

Türkiyənin Ukrayna üçün mühüm tərəfdaş olduğunu vurğulayan Umerov deyib: “Türkiyə Ukraynanın mühüm tərəfdaşlarından biridir və dialoq üçün əsas platformalardan biridir. İşlərimizi yaxın əməkdaşlıq şəraitində davam etdiririk.”

Umerov görüşdən sonra Ukrayna Prezidentini təmasların nəticələri barədə məlumatlandırdığını, Türkiyə səfəri çərçivəsində MİT rəhbəri Kalın ilə də işgüzar görüş keçirdiyini açıqlayıb.

Bu görüşlə bağlı isə Umerov bildirib: “Təhlükəsizlik vəziyyəti ilə bağlı qiymətləndirmələr apardıq, mümkün ssenariləri nəzərdən keçirdik və danışıqlar prosesləri ilə regional dinamikalara uyğun atılacaq addımları koordinasiya etdik.”

Açıqlamada həmçinin Rusiyanın saxladığı hərbi əsirlərin azad edilməsi, eləcə də mülki şəxslərin və uşaqların geri dönüşü məsələlərinin də görüşlərin gündəmində olduğu qeyd edilib.

Umerov mövcud əməkdaşlıq formatları çərçivəsində işlərin sistemli şəkildə davam etdiriləcəyini vurğulayıb.