Azərbaycan News Agency

Rusiya Prezidentinin köməkçisi Uşakov Putinlə Tramp arasında telefon danışığının baş tutduğunu bildirib.

Uşakovun sözlərinə görə, danışıq Trampın təşəbbüsü ilə həyata keçirilib. Tramp Ukraynadakı münaqişə kontekstində mövcud vəziyyəti və mümkün həll yollarını Rusiya Prezidenti ilə müzakirə etmək istəyib. O, bu məsələləri bu gün Florida ştatında Mar-a-Laqoda Ukrayna Prezidenti Volodimir Zelenski ilə keçirəcəyi üzbəüz görüşdən əvvəl dəyərləndirməyi məqsəd qoyub.

Təxminən 1 saat 15 dəqiqə davam edən danışığın əvvəlində iki lider Milad və Yeni il münasibətilə qarşılıqlı təbriklərini çatdırıb, hər iki ölkənin xalqlarına xoş arzularını bildiriblər.

Danışıq bütövlükdə dostyana, konstruktiv və işgüzar mühitdə keçib; tərəflər Ukrayna böhranının davamlı və dinc yolla həllinə doğru irəliləyiş əldə olunmasına qarşılıqlı maraq göstəriblər.

Tramp mövcud şəraitdə razılaşmaya nail olunması ilə bağlı Rusiya tərəfinin qiymətləndirmələrini diqqətlə dinləyib. Putin xüsusilə Ankoric sammiti zamanı və iki ölkə administrasiyaları arasında aparılan çoxsaylı təmaslar çərçivəsində əldə olunmuş əsas Rusiya–ABŞ anlaşmalarının əhəmiyyətini vurğulayıb.

Danışıq zamanı Ukrayna ətrafındakı prosesin idarə olunması məqsədilə iki ayrı işçi qrupunun yaradılması barədə də razılıq əldə olunub. Bu qruplardan biri təhlükəsizlik məsələlərini, digəri isə iqtisadi mövzuları əhatə edəcək. İşçi qruplarının fəaliyyətə başlaması ilə bağlı detalların yanvarın əvvəlində dəqiqləşdirilməsi gözlənilir.

Putin və Tramp ABŞ Prezidentinin bu axşam Mar-a-Laqoda Ukrayna nümayəndə heyəti ilə keçirəcəyi görüşdən sonra nəticələri dəyərləndirmək üçün yenidən telefon əlaqəsi qurmaq barədə də razılığa gəliblər.