Azərbaycan News Agency

Ukrayna Prezidenti Zelenski vurğulayıb ki, cəbhədə əldə olunan hərbi uğurlar danışıqlar prosesinin bir hissəsidir. O deyib: «Əsgərlərimizin zərərsizləşdirdiyi hər bir işğalçı və qəhrəman bölmələrimizin döyüşlərdə əldə etdiyi hər bir nəticə danışıqlarda da nəticədir və uğurlu danışıqlarımızın əsasını təşkil edir».

Zelenski son həftələrdə bir çox tərəfdaşın Kupyansk əməliyyatına görə ona təşəkkür etdiyini, bu əməliyyatın Ukraynaya olan inamı bərpa etdiyini və Rusiya Prezidenti Vladimir Putinin yalanlarını üzə çıxardığını bildirib. O qeyd edib: «Biz Moskvanın həmişə yalan danışdığını bilirik; lakin dünya da davamlı olaraq yalanla həqiqətin fərqini görməlidir».

Zelenski əlavə edib ki, Ukrayna əsgərləri döyüş meydanında həqiqəti göstərməyə nail olub, Rusiyanın bu müharibədə yanıldığını və Ukraynanı dəstəkləyən tərəfdaşların doğru tərəfdə olduğunu sübut ediblər.

O, həmçinin təhlükəsizlik və müdafiə qüvvələrinin üzvlərini “Qızıl Ulduz” nişanı və “Döyüş Ləyaqəti Xaçı” ilə təltif etdiyini, həlak olmuş və ölümündən sonra təltif olunan qəhrəmanların mükafatlarının ailələrinə təqdim edildiyini bildirib.

Zelenski çıxışını belə tamamlayıb: «Ukrayna əsgərlərinə şan olsun. Ukraynaya şan olsun».