Azərbaycan News Agency

Ukrayna Prezidenti Volodimir Zelenski Danimarka Kralı, Vəliəhdi və Baş naziri ilə birlikdə Danimarka iş dünyasının nümayəndələri ilə keçirdiyi görüş barədə açıqlama verib. O bildirib ki, görüşdə müdafiə və mülki təyinatlı məhsullar istehsal edən, geniş istehsal imkanlarına malik təxminən 70 şirkətin nümayəndəsi iştirak edib.

Zelenski şirkətlərin logistika, yaşıl enerji, pilotsuz dəniz nəqliyyat vasitələri, radar sistemləri və gələcək FREYJA sistemi üçün komponentlər də daxil olmaqla müxtəlif sahələrdə fəaliyyət göstərdiyini qeyd edib. O, bir çox Danimarka şirkəti ilə uzun müddətdir əməkdaşlıq etdiklərini bildirib.

Ukraynada onilliklərdir fəaliyyət göstərən zavodların müharibə şəraitinə baxmayaraq istehsalı davam etdirdiyini vurğulayan Zelenski Danimarka müəssisələrinin ölkədəki mövcudluğunu qorumasından məmnunluğunu ifadə edib. Yeni istehsal müəssisələrinin açıldığını və tərəfdaşlıq sahələrinin genişləndirildiyini bildirən Zelenski Danimarka şirkətlərinin Ukraynaya investisiyalarını artırmağa hazır olduqlarını qeyd edib.

Zelenski Danimarkanı Ukraynanın ən etibarlı tərəfdaşlarından biri kimi xarakterizə edərək iki ölkə arasındakı güclü əməkdaşlığa və dostluğa diqqət çəkib.