Azərbaycan News Agency

Ukrayna Prezidenti Volodimir Zelenski Rusiya-Ukrayna müharibəsinin təsirləri və taxıl ixracına qoyulan maneələr səbəbindən yarana biləcək ərzaq böhranı ilə bağlı açıqlamalar verib.

Zelenski Rusiyanın müharibəni bitirmək istədiyinə dair heç bir əlamətin görünmədiyini və gərginliyin azaldılması istiqamətində əsas addımların belə atılmadığını bildirib. Enerji məsələsinin ön plana çıxdığını, lakin taxıl ixracının arxa planda qaldığını qeyd edən Zelenski deyib: “Hamı dizel yanacağından danışır və taxılı unudur. Bir və ya iki ay sonra hamı kənd təsərrüfatı böhranından danışmağa başlayacaq”.

Zelenski Ukraynanın Afrika ölkələrinə, bəzi Asiya dövlətlərinə və Yaxın Şərq bazarlarına milyonlarla ton taxıl ixrac etdiyini vurğulayıb. Rusiyanın dəniz yolu ilə ixraca mane olduğunu bildirərək deyib: “Bu ölkələrə kifayət qədər ərzaq çatmayacaq”.

Zelenski ABŞ-nin yaranmış vəziyyətin təsirlərini hiss etmədiyi üçün diqqətin yalnız enerji məsələsinə yönəldiyini iddia edib. O, taxıl təchizatındakı problemlərin çoxsaylı ölkələrə təsir edə biləcək aclıq böhranına çevrilə biləcəyinə diqqət çəkib.

Mümkün böhranların baş verməzdən əvvəl qarşısının alınmasının vacibliyini vurğulayan Zelenski bildirib: “Biz hər şeyi və hər kəsi düşünməliyik, çünki hamımız bu planetdə yaşayırıq. Müxtəlif böhranların başlamazdan əvvəl qarşısını ala və onların gətirə biləcəyi çətinlikləri önləyə bilərik”.