Azərbaycan News Agency

Qazaxıstan Xarici İşlər Nazirliyi Prezident Kasım-Jomart Tokayevin “Yeni tarixi dövrdə Qazaxıstanın aktual prioritetləri” adlı xalqa müraciətində müəyyən etdiyi hədəflərlə bağlı xarici diplomatik missiyaların və beynəlxalq təşkilatların nümayəndələri üçün məlumatlandırma görüşü təşkil edib.

Astanada keçirilən görüşdə təxminən 100 diplomatik nümayəndə iştirak edib. Tədbirdə Qazaxıstanın xarici işlər naziri Muxtar Tileuberdi, sənaye və tikinti naziri Yersayın Naqaspayev və nəqliyyat nazirinin müavini Damir Kojaxmetov çıxış ediblər.

Görüşün açılışında çıxış edən Tileuberdi Prezident Tokayevin müstəqilliyin 35-ci ilində etdiyi xalqa müraciətin ölkənin indiyədək keçdiyi inkişaf yolunu qiymətləndirdiyini və uzunmüddətli inkişaf strategiyasını ortaya qoyduğunu bildirib.

Tileuberdi qlobal qeyri-müəyyənliyin artdığı bir dövrdə Qazaxıstanın xarici siyasətinin konstruktiv dialoq, beynəlxalq öhdəliklərə sadiqlik və balanslaşdırılmış praqmatizm prinsiplərinə əsaslandığını bildirib. O, 2025-ci ildə ölkəyə birbaşa xarici investisiyaların 14,4 faiz artaraq 20,5 milyard dollara çatdığını qeyd edib.

Tileuberdi 2029-cu ilin sonunadək infrastrukturun modernləşdirilməsi üçün Milli Fonddan təxminən 6,5 trilyon tenge ayrılacağını, 2027-ci ilin isə “Ümummilli Genişmiqyaslı Tikinti İli” elan edilməsinin təklif olunduğunu bildirib.

Enerji, aqrar sənaye, rəqəmsallaşma, süni intellekt və su idarəçiliyini prioritet əməkdaşlıq sahələri kimi sadalayan Tileuberdi Alatau şəhərində ingilis ümumi hüquq sisteminə əsaslanan İnvestisiya Məhkəməsinin yaradılacağını və yeni Mülki Məcəllənin 2027-ci ilin sonunadək qəbul edilməsinin planlaşdırıldığını bildirib. O, həmçinin Qazaxıstanın xaricdəki diplomatik nümayəndəliklərinə mühüm investisiya layihələrinə fərdi dəstək göstərilməsi barədə tapşırıq verildiyini qeyd edib.

Sənaye və tikinti naziri Naqaspayev isə “Ümummilli Genişmiqyaslı Tikinti” proqramının yerli sənayenin inkişafını sürətləndirməyi və investisiyaları artırmağı hədəflədiyini söyləyib. Emal sənayesinin ümumi daxili məhsuldakı payının 13 faizə çataraq mədənçıxarma sektorunu geridə qoyduğunu bildirən Naqaspayev 2023-cü ildən bəri ölkədə 647 layihənin həyata keçirildiyini açıqlayıb.

Naqaspayev maşınqayırma, metallurgiya, kimya və elektrotexnika sahələrini investisiya baxımından önə çıxan sektorlar kimi göstərib. İnvestorlara vergi və gömrük güzəştləri, hazır infrastruktura malik torpaq sahələri və vahid pəncərə prinsipi ilə xidmət təklif olunduğunu bildirən nazir məqsədlərinin texnologiya transferi, istehsalın lokallaşdırılması, xammalın dərin emalı və işçi qüvvəsinin hazırlanması əsasında uzunmüddətli sənaye tərəfdaşlıqları qurmaq olduğunu vurğulayıb.

Nəqliyyat nazirinin müavini Kojaxmetov Qazaxıstanın Avrasiyanın aparıcı logistika mərkəzlərindən birinə çevrilməyi və tranzit ölkə statusundan beynəlxalq yük axınlarını idarə edən mərkəzə çevrilməyi hədəflədiyini bildirib.

Kojaxmetov Çinlə Avropa arasında avtomobil yolu ilə yük daşımalarının təxminən 85 faizinin Qazaxıstan üzərindən həyata keçirildiyini, ötən il tranzit daşımaların 18 faiz artaraq 39,1 milyon tona çatdığını qeyd edib.

Kojaxmetov Baxtı-Ayaqöz dəmir yolu xəttinin, Aral-Xəzər nəqliyyat dəhlizinin, Rusiya və Qırğızıstan sərhədlərindəki 37 avtomobil sərhəd-keçid məntəqəsinin modernləşdirilməsinin və Astanada yeni hava limanının tikintisinin planlaşdırılan layihələr arasında olduğunu bildirib. Transxəzər Beynəlxalq Nəqliyyat Marşrutuna xüsusi önəm verən nazir xarici tərəfdaşları limanlara, hava limanlarına və logistika mərkəzlərinə investisiya yatırmağa dəvət edib.

Görüşün sual-cavab hissəsində diplomatik missiyaların nümayəndələri Qazaxıstanın investisiya mühiti, investisiya təminatları, layihələrdə iştirak şərtləri, nəqliyyat dəhlizlərinin inkişafı və kritik minerallar sahəsində əməkdaşlıq məsələlərinə maraq göstəriblər.

Görüşün sonunda Qazaxıstanın xaricdəki diplomatik nümayəndəliklərinin ölkədə müasir istehsal müəssisələri qurmaq və texnologiya transferini həyata keçirmək istəyən şirkətlərə hərtərəfli dəstək göstərəcəyi bildirilib. Qazaxıstanın uzunmüddətli investisiya tərəfdaşlıqlarına açıq olduğu vurğulanıb.