Azərbaycan News Agency

Niderland bu gündən etibarən daha 10 ölkə ilə birlikdə Polşada keçirilən çoxmillətli Koalicja təlimində iştirak edir. Niderland Müdafiə Nazirliyinin açıqlamasında təlimin Ukrayna üçün Çoxmillətli Qüvvələrin (MNF-U) hazırlıq prosesində mühüm mərhələ olduğu bildirilib.

İstəklilər Koalisiyası çərçivəsində yaradılan MNF-U qüvvələrinin müharibə başa çatdıqdan sonra Ukrayna ordusuna dəstək vermək üçün hazırlandığı qeyd olunub.

Niderlandın təlimə bir neçə yüz hərbçi ilə qatıldığı, ən böyük töhfənin quru qoşunları tərəfindən verildiyi bildirilib. Niderland Hərbi Hava Qüvvələri F-35 qırıcı təyyarələri və yardımçı heyətlə iştirak edir. Bundan əlavə, mütəxəssis dəstəyi və qərargah heyəti də cəlb olunub.

Ümumilikdə 11 ölkədən təxminən 2 min 800 hərbçinin iştirak etdiyi təlimdə çoxmillətli qüvvələrin Polşa üzərindən Ukraynaya sürətlə yerləşdirilməsi və orada fəaliyyət göstərməsi ssenariləri üzərində iş aparılır. Təlim çərçivəsində şəxsi heyətin və hərbi texnikanın daşınması, beynəlxalq komandanlıq və idarəetmə prosesləri, bölmələrin mühafizəsi və təchizatı məsələləri nəzərdən keçirilir.

Fransa və Böyük Britaniyanın rəhbərliyi ilə keçirilən təlimə ev sahibliyi edən Polşa logistika və tibbi dəstəyin mühüm hissəsini təmin edir. Almaniya, Belçika, İspaniya, Litva, Estoniya, Türkiyə və İsveç də iştirakçı ölkələr sırasındadır.

Açıqlamada müharibənin başa çatmasının Avropanın sabitliyi və Niderlandın təhlükəsizliyi baxımından əhəmiyyətli olduğu vurğulanıb. Təlimin iştirakçı ölkələrin birgə hazırlıq səviyyəsini və birlikdə fəaliyyət göstərmək qabiliyyətini nümayiş etdirdiyi bildirilib. Niderlandın hərbi planlaşdırma prosesinə əvvəldən yaxından cəlb olunduğu qeyd edilib.

Təlimdə iştirakın Niderland hərbçilərinin Ukraynaya göndəriləcəyi anlamına gəlmədiyi vurğulanıb. Müharibədən sonra Ukraynada mümkün missiyada Niderlandın iştirakı beynəlxalq və milli siyasi qərarların qəbul edilməsi proseslərindən asılı olacaq.