Azərbaycan News Agency

Xorvatiyanın Baş naziri Andrey Plenkoviç uşaq və gənc idmançılar arasında sağlamlıq risklərinin qarşısının alınması və idmanda təhlükəsizliyin artırılması məqsədilə 2027-ci ilin büdcəsindən 11 milyon avro ayrılacağını elan edib.

Xorvatiya Akademik İdman Birliyinin nümayəndə heyətini qəbul edən Plenkoviç xorvat tələbələri idman sahəsində qazandıqları uğurlara görə təbrik edib. O bildirib ki, yeni İdman Qanununa və tibbi müayinələrlə bağlı qaydalara uyğun olaraq 18 yaşadək uşaq və gənc idmançıların tibbi yoxlanışlarının maliyyələşdirilməsi üçün büdcədə vəsait nəzərdə tutulacaq.

Plenkoviç bu tədbirin mümkün sağlamlıq risklərinin maksimum dərəcədə qarşısını almağı hədəflədiyini qeyd edərək, gənc idmançıların yetkinlik yaşına çatdıqdan sonra daha yüksək səviyyəli yarışlarda iştiraklarını davam etdirə bilmələri üçün onların sağlamlığının və fiziki hazırlığının qorunmasının məqsəd qoyulduğunu bildirib.

Xorvatiyanın 2028-ci il Avropa Universitet Oyunlarına Split şəhərində ev sahibliyi edəcəyini xatırladan Plenkoviç hökumətin Spaladium Arenanın yenidən fəaliyyətə başlamasına, Gripe İdman Mərkəzinin və Brodarica Stadionunun yenilənməsinə dəstək vermək barədə qərar qəbul etdiyini açıqlayıb.

Plenkoviç universitet idmançılarının qazandıqları medalların onların istedadını, fədakarlığını və gərgin əməyini əks etdirdiyini vurğulayıb.