Azərbaycan News Agency

ABŞ-ın Suriya üzrə xüsusi nümayəndəsi Tom Barrak qeyd edib ki, Suriyada kürdlər üçün ən böyük fürsət Suriya Prezidenti Əhməd əl-Şaraa rəhbərliyində formalaşan yeni hökumət dövründə həyata keçiriləcək keçid prosesindədir. O vurğulayıb ki, bu proses kürdlər üçün tam inteqrasiya, vətəndaşlıq hüquqları, mədəni qorunma və siyasi iştirak yolunu açır və bu hüquqlar Bəşər Əsəd rejimi dövründə uzun müddət əngəllənmişdi.

Barrak Suriya Demokratik Qüvvələrinin (SDQ) İŞİD-ə qarşı ən effektiv yerli qüvvə olduğunu vurğulayaraq bildirib: “Şam artıq təhlükəsizlik məsuliyyətlərini üzərinə götürməyə hazır və mövqedə olduğu üçün SDQ-nin əsas yerli anti-İŞİD qüvvəsi kimi mövcudluq məqsədi böyük ölçüdə başa çatıb”.

ABŞ-ın SDQ ilə Suriya hökuməti arasında inteqrasiyanı asanlaşdırmaq üçün fəal rol oynadığını bildirən Barrak deyib: “18 yanvarda imzalanmış inteqrasiya sazişinin təmin olunması və prosesin vaxtında və sülh yolu ilə həyata keçirilməsi üçün Suriya hökuməti və SDQ rəhbərliyi ilə geniş müzakirələr apardıq”.

Barrak əlavə edib ki, saziş SDQ döyüşçülərinin milli orduya qoşulmasını, strateji infrastrukturun təhvil verilməsini, eləcə də İŞİD həbsxanaları və düşərgələrinin Şam administrasiyasına təhvil verilməsini nəzərdə tutur və vurğulayıb ki, “ABŞ-ın prioriteti İŞİD həbsxanalarının təhlükəsizliyini təmin etmək və SDQ ilə Suriya hökuməti arasında sülh yolu ilə inteqrasiyanı asanlaşdırmaqdır”.