Azərbaycan News Agency

CCTV-nin məlumatına görə, Cənubi Afrika Milli Fəlakətlərin İdarə Edilməsi Mərkəzi davam edən güclü yağışların yaratdığı sel fəlakətinə görə milli fəlakət elan edib.

Dekabr ayının sonlarından bəri davam edən yağışlar, xüsusilə Limpopo və Mpumalanqa əyalətlərində ciddi dağıntılara səbəb olub. Rəsmilər bildiriblər ki, Limpopoda azı 17 nəfər, Mpumalanqada isə 20 nəfər sel nəticəsində həyatını itirib.

Limpopoda 1 600-dən çox ev və 31 məktəb zərər görüb, Mpumalanqada isə mindən çox yaşayış evi müxtəlif səviyyələrdə zədələnib. Afrikanın ən böyük təbiət qoruqlarından biri olan Kruger Milli Parkı da sel səbəbindən qismən bağlanıb. Parkda mahsur qalan 600-dən çox ziyarətçi təhlükəsiz ərazilərə təxliyə edilib.

Cənubi Afrika Milli Müdafiə Qüvvələri xilasetmə işlərinə dəstək məqsədilə iki helikopter cəlb edib.