Azərbaycan News Agency

İsrail Müdafiə Qüvvələri (İDF) Cənubi Livandakı təhlükəsizlik zonasında xidmət aparan bölmələrinin Livan Ordusuna məxsus bir bölmə və mühəndis texnikasının təhlükəsizlik zonasına təxminən 150 metr daxil olduğunu açıqlayıb.

İDF-nin açıqlamasına görə, hadisə Zoter Əş-Şərqiyyə bölgəsində baş verib. Bildirilib ki, Livan Ordusuna məxsus bölmə tərəflər arasında qüvvədə olan razılaşmalara zidd olaraq təhlükəsizlik zonasındakı maneələri aradan qaldırıb.

İsrail ordusu bildirib ki, bölgədə xidmət aparan hərbçilər Livan qüvvələrini təhlükəyə atmadan yalnız havaya xəbərdarlıq atəşi açıblar və bunun nəticəsində həmin bölmə ərazidən geri çəkilib. Hadisə zamanı ölən və ya yaralanan olmayıb.

Açıqlamada həmçinin qeyd olunub ki, Livan Ordusunun daxil olduğu ərazi "pilot zona"ya daxil deyil və Livan Ordusundan mövcud razılaşmalara uyğun davranaraq yalnız razılaşdırılmış ərazilərdə fəaliyyət göstərməsi istənilib.

İDF əvvəlcədən koordinasiya olmadan ediləcək hər hansı kənaraçıxmanın ərazidə xidmət aparan qüvvələrin təhlükəsizliyini risk altına qoya biləcəyi barədə xəbərdarlıq edib.