Azərbaycan News Agency

Qətər Xarici İşlər Nazirliyi İranın İordaniya, Bəhreyn və Küveytə yenidən həyata keçirdiyi hücumları, eləcə də Hörmüz boğazından keçən Küveytə məxsus "Kaifan" tankerinin hədəfə alınmasını pisləyib.

Nazirliyin bəyanatında qeyd olunub ki, sözügedən hücumlar üç ölkənin suverenliyi və ərazi bütövlüyünün "açıq şəkildə pozulması" olmaqla yanaşı, dəniz təhlükəsizliyi və qlobal enerji təchizatı üçün ciddi təhdid yaradır. Bəyanatda hücumların beynəlxalq hüquqa, BMT Nizamnaməsinə və mehriban qonşuluq prinsiplərinə zidd olduğu vurğulanıb.

Qətər xəbərdarlıq edib ki, davam edən hücumlar regionda gərginliyi daha da artıra və təhlükəsizliklə sabitliyin təmin edilməsinə yönəlmiş siyasi və diplomatik təşəbbüsləri zəiflədə bilər.

Doha regional təhlükəsizliyi təhdid edən bütün hərbi əməliyyatların dərhal dayandırılmasına çağıraraq, tərəfləri gərginliyi artıracaq addımlardan çəkinməyə, dialoq və danışıqlara qayıtmağa və diplomatik razılaşmalara sadiq qalmağa dəvət edib.

Bəyanatda həmçinin Qətərin İordaniya, Bəhreyn və Küveytlə tam həmrəylik içində olduğu vurğulanıb və bu ölkələrin öz suverenliklərini və təhlükəsizliklərini qorumaq məqsədilə atacaqları addımlara dəstək ifadə olunub.