Azərbaycan News Agency

İsrailin müdafiə naziri İsrael Katz Livanın cənubunda aparılan hərbi əməliyyatlar və strateji hədəflər barədə açıqlama verib.

Katz bildirib: "Baş nazir Benyamin Netanyahu və mən terror fəaliyyətləri üçün istifadə olunan Litani çayı üzərindəki bütün körpülərin dərhal dağıdılması barədə göstəriş verdik ki, Hizbullah üzvlərinin və silahların cənuba keçidi qarşısı alınsın".

Sərhəd bölgələrində görülən tədbirlərə toxunan Katz deyib: "Həmçinin Qəzzadakı Beyt Hanun və Rəfah modellərinə uyğun olaraq İsrail yaşayış məntəqələrinə qarşı təhdidlərin qarşısını almaq üçün təmas kəndlərində Livan evlərinin sökülməsinin sürətləndirilməsi barədə göstəriş verdik".

Katz vurğulayıb: "İsrail Müdafiə Qüvvələri (IDF) Hizbullah üzvlərini zərərsizləşdirmək və yaşayış məntəqələrini qorumaq üçün Livanda quru əməliyyatlarını fasiləsiz davam etdirir. 7 oktyabrdan əvvəlki vəziyyətin qayıtmasına imkan verməməkdə qərarlıyıq. Şimal sakinlərini qoruyacağımıza söz verdik və bunu tam şəkildə həyata keçirəcəyik".