Azərbaycan News Agency

NATO-nun 36-cı Dövlət və Hökumət Başçıları Zirvəsindən sonra Ankara Bəyannaməsi dərc olunub. Bəyannamədə müttəfiq ölkələr kollektiv müdafiəyə sadiqliklərini bir daha təsdiqləyərək, müdafiə xərclərinin artırılması, müdafiə sənayesinin gücləndirilməsi və Ukraynaya dəstəyin davam etdirilməsi ilə bağlı yeni öhdəliklər götürüblər.

Liderlər Vaşinqton Müqaviləsinin 5-ci maddəsi çərçivəsində kollektiv müdafiə prinsipinə sadiqliklərini bir daha vurğulayaraq, "Bir müttəfiqə qarşı hücum bütün müttəfiqlərə qarşı edilmiş hücum hesab olunur." mesajını təkrarlayıblar. Bəyanatda NATO-nun birliyi və həmrəyliyinin Alyansın təhlükəsizliyinin əsasını təşkil etdiyi bildirilib.

Bəyannamədə Rusiyanın Avro-Atlantik təhlükəsizliyinə yaratdığı təhdid və terrorizmə qarşı çəkindirmə və müdafiə qabiliyyətinin gücləndirilməsinin davam etdiriləcəyi qeyd olunub. Avropadakı müttəfiqlər və Kanadanın 2025-ci ildə əsas müdafiə ehtiyacları üçün 139 milyard ABŞ dollarından çox əlavə sərmayə yatırdığı, Ankara Zirvəsində isə dəyəri 50 milyard ABŞ dollarını aşan yeni müdafiə satınalma proqramlarının elan edildiyi vurğulanıb.

NATO üzvləri müdafiə sənayesində istehsal gücünün artırılması, müttəfiqlər arasında müdafiə ticarətinə maneələrin aradan qaldırılması və yeni texnologiyaların inkişaf etdirilməsi məqsədilə əməkdaşlığın genişləndiriləcəyini bildiriblər. Bəyanatda süni intellekt, kibertəhlükəsizlik, kosmik texnologiyalar, pilotsuz sistemlər, inteqrə olunmuş hava və raketdən müdafiə sistemləri, eləcə də yüksək dəqiqlikli zərbə imkanlarına investisiyaların artırılacağı qeyd olunub.

Ankara Bəyannaməsində Ukraynaya göstərilən dəstək də əsas mövzulardan biri olub. NATO üzvləri Ukraynanın suverenliyi və ərazi bütövlüyünə dəstəklərini bir daha təsdiqləyərək, 2026-cı ildə 70 milyard avro dəyərində hərbi avadanlıq, təlim və yardım göstərməyi öhdələrinə götürüblər. Bəyannamədə 2027-ci ildə də ən azı eyni səviyyədə dəstəyin davam etdirilməsi məqsədi qəbul edilib.

Liderlər həmçinin İranın nüvə silahına malik olmamalı olduğunu bir daha vurğulayaraq, Hörmüz boğazında gəmiçilik azadlığına tam şəkildə riayət edilməsinə çağırış ediblər.

Bəyannamənin sonunda zirvəyə ev sahibliyi edən Türkiyəyə təşəkkür edilib, müttəfiqlər isə növbəti NATO Zirvəsində yenidən bir araya gəlmək arzularını ifadə ediblər.