Azərbaycan News Agency

İsrailin Baş naziri Benyamin Netanyahu 22 mart 2026-cı ildə Dimonada İran tərəfindən həyata keçirilən raket hücumundan sonra açıqlamalar verib. O çıxışında deyib: "Əgər İranın sivilizasiyanın düşməni olduğunu anlamaq istəyirsinizsə, bunu son 48 saatda gördünüz. Onlar mülki şəxslərə və uşaqlara hücum etdilər. Burada uşaq bağçası var, burada qocalar evi var. Onlar mülki şəxslərə qarşı terror silahlarından istifadə edir və çox vaxt beynəlxalq hüquq tərəfindən qadağan olunmuş kaset bombalarından istifadə edirlər".

Netanyahu Qüdsdəki müqəddəs məkanlara hücumlara da diqqət çəkərək deyib: "Onlar Müqəddəs Qəbir Kilsəsini, Əl-Əqsa məscidini və Qərb Divarını məhv edə biləcək ballistik raketlər atıblar. Bunlar üç monoteist dinin ən müqəddəs yerləridir… Onlar buna əhəmiyyət vermirlər. Hər şeyə hücum edirlər".

O, İranın beynəlxalq miqyaslı təhdidlərinə də toxunaraq deyib: "Onlar 4 min kilometr uzaqlıqdakı Dieqo Qarsiya bazasına qitələrarası ballistik raket atıblar. İndi demək olar ki, Avropanın hər yerinə çata bilirlər. Mən illərdir xəbərdarlıq edirəm". O əlavə edib: "Onlar Hörmüz boğazını bağlayıblar və dünyanı neft vasitəsilə şantaj edirlər".

Netanyahu dünya liderlərini hərəkətə çağıraraq deyib: "Prezident Tramp haqlı idi. Biz yalnız özümüz üçün deyil, sizin üçün də mübarizə aparırıq. O, sadə bir sual verdi: Haradasınız? Prezident Trampın çağırışını və vizyonunu dinləməyin vaxtıdır".