Azərbaycan News Agency

Xorvatiyanın Baş naziri Andrey Plenkoviç Xorvatiya Parlamentində çıxışı zamanı 15-16 oktyabr tarixlərində Brüsseldə keçirilən Avropa İttifaqı Şurasının iclasında müzakirə olunan məsələləri dəyərləndirib.

Plenkoviç Avropanın təhlükəsizliyini və iqtisadi gücünü artırmaq üçün müdafiə qabiliyyəti, enerji təhlükəsizliyi və rəqabət qabiliyyətinin prioritet istiqamətlər arasında olduğunu bildirib. Ukraynaya maliyyə və müdafiə dəstəyinin davam etdirilməsinin vacibliyini vurğulayan Plenkoviç qeyri-qanuni miqrasiya ilə mübarizənin və Aİ-nin genişlənmə siyasətinin də gündəmdə olduğunu qeyd edib.

Plenkoviç Bosniya və Herseqovinanın Avropa İttifaqına üzvlük prosesinin dəstəklənməsinin vacibliyini ifadə edib. O, Monteneqro ilə münasibətlərdə həllini gözləyən səkkiz məsələnin olduğunu, bunlardan ikisi üzrə irəliləyiş əldə edildiyini, qalan altı məsələnin isə hələ də həllini gözlədiyini bildirib.

Plenkoviç Xorvatiyanın Avropa İttifaqının yeni büdcəsindən daha çox maliyyə vəsaiti əldə etməyi hədəflədiyini qeyd edərək "Bir Avropa, Bir Bazar" planı ilə Avropanın rəqabət qabiliyyətini və dayanıqlığını artırmağı məqsəd qoyduqlarını açıqlayıb.