Azərbaycan News Agency

BMT-nin Baş katibi Quterreş bildirib ki, irqi ayrı-seçkilik insan hüquqlarının və insan ləyaqətinin pozulmasıdır.

Bu ayrı-seçkiliyin geniş yayılmış və öyrənilmiş davranış olduğunu qeyd edən Quterreş deyib: “Bu, tarix boyu saysız-hesabsız insan itkisinə və böyük əzablara səbəb olub. Dünyamızda yeri olmamalıdır, lakin məktəblərdə, iş yerlərində və saysız gündəlik qarşılıqlı əlaqələrdə özünü göstərir. İrqçilik hamımıza zərər verir.”

Quterreş rəqəmsal platformalarda və siyasi ritorikada irqçilik və ksenofobiyanın yayılmasından dərin narahatlıq duyduğunu vurğulayıb.

İrqçiliklə mübarizənin həllinin həmrəylik olduğunu vurğulayan Quterreş bildirib:

“Hökumətlər, institutlar, bizneslər və icmalar hər bir fərdin ləyaqətini, ədalətini, bərabərliyini və hüquqlarını qorumaq üçün birlikdə işləməlidirlər. Bu isə BMT daxil olmaqla, irqçiliyə, irqi ayrı-seçkiliyə, ksenofobiyaya və bunlarla bağlı dözümsüzlüyə son qoymaq üçün təcili və konkret addımlar atmaq deməkdir. Mən zərərli şəxslərarası münasibətlərdən tutmuş dərin kök salmış institusional və sistemli qərəzlərə qədər irqçiliyin bütün formalarına qarşı mübarizə aparmağa qərarlıyam.”