Azərbaycan News Agency

İspaniyanın Baş naziri Pedro Sançes hökumətinin fəaliyyətinin üçüncü ildönümü münasibətilə bildirib ki, son üç ildə iqtisadiyyat, məşğulluq, sosial hüquqlar və təhsil sahələrində mühüm nailiyyətlər əldə olunub və islahat prosesi davam etdiriləcək.

Sançes sosial media hesabında paylaşdığı mesajda üç il əvvəl ispan seçicilərinin "tərəqqi gündəliyini" dəstəklədiyini və bu müddətdə İspaniyanın Avropanın iqtisadi artımına liderlik etdiyini bildirib.

Baş nazir qeyd edib ki, hökuməti dövründə təxminən 1,6 milyon yeni iş yeri yaradılıb, ev təsərrüfatlarının real gəlirləri inflyasiyanı 6 faiz üstələyəcək səviyyədə artıb və orta illik pensiyalar 2 470 avro yüksəldilib.

Enerji siyasətinə də toxunan Sançes bildirib ki, İspaniyada elektrik enerjisinin qiyməti İtaliyadakı qiymətin təxminən üçdə biri, Almaniyadakı qiymətin isə yarısı səviyyəsindədir.

O həmçinin analıq və atalıq məzuniyyətlərinin üç həftə uzadıldığını, 0-3 yaş qrupu üçün dövlət təhsili və peşə təhsilində 235 min yeni yer yaradıldığını qeyd edib.

Sançes İspaniyanın beynəlxalq aləmdə tolerantlıq, sülh və etik dəyərlər baxımından nümunə ölkəyə çevrildiyini iddia edərək bildirib: "Qarşıda hələ görüləsi çox iş var. Lakin məqsədlərimiz və prinsiplərimiz çox aydındır."

Baş nazir çıxışını bu sözlərlə yekunlaşdırıb: "Biz xalqın hökumətiyik, tərəqqi hökumətiyik, İspaniyanın hökumətiyik."