Azərbaycan News Agency

Suriya Ordusunun Əməliyyat Komandanlığının açıqlamasında bildirilib ki, bəzi vasitəçilərin müdaxilə cəhdlərinə və Hələbin şərq bölgəsindəki təhdidlərin aradan qaldırılması istiqamətində görülən tədbirlərə baxmayaraq, Hələb şəhəri və şərq kəndləri üçün təhlükə davam edir.

Açıqlamada terrorçu Bahoz Erdalın Qəndil dağlarından Təbqə bölgəsinə gəldiyi və PKK üzvlərinin buradan Suriya xalqına və orduya qarşı hərbi fəaliyyətləri idarə edəcəyinin müəyyən edildiyi qeyd olunub. Həmçinin, PKK ünsürlərinin Hələb şəhəri və şərq kəndlərindəki mülki əhaliyə qarşı yeni hücumlara hazırlıq çərçivəsində Meskene və Deyr Hafir bölgələrinə çoxlu sayda İran istehsalı pilotsuz uçuş aparatları göndərdiyi bildirilib.

Komandanlıq PKK üzvləri və keçmiş rejim qalıqlarından ibarət yeni qrupların Təbqə bölgəsinə çatdığını, bu ünsürlərin Deyr Hafir, Meskene və ətrafındakı mövqelərə köçürülməsinin izlənildiyini bildirib. Suriya Ordusunun YPG və müttəfiqlərinin baza kimi istifadə etdiyi ərazilərdə mülki şəxslərin təhlükəsizliyini təmin etmək üçün fəaliyyətlərini davam etdirdiyi vurğulanıb.

Açıqlamada ordunun Suriya xalqını müdafiə etməyə və ölkənin suverenliyini qorumağa davam edəcəyi, keçmiş rejim qalıqları və sərhədlərdən kənardan gələn terror ünsürlərinin Suriyanı sabitlikdən salmasına və cəmiyyəti hədəf almasına icazə verilməyəcəyi qeyd olunub.