Azərbaycan News Agency

Prezident Əhməd Şəra müraciətində bildirib: “Fitnə xarakterli hekayələrə inanmayın; sizə zərər verən hər kəs bizim düşmənimizdir. Biz Suriyanın təhlükəsizliyini, inkişafını və birliyini istəyirik.”

O əlavə edib: “Hüquqlarınızı və xüsusiyyətlərinizi qanun mətnində təmin edəcək xüsusi fərman qəbul edirik; təhlükəsiz qayıdışın və vahid vətənin qurulmasında tam iştirakın yolunu açırıq.”

2026-cı il 13 nömrəli Prezident Fərmanında suriyalı kürd vətəndaşların Suriya xalqının əsas və ayrılmaz hissəsi olduğu, onların mədəni və dil kimliyinin vahid Suriya milli kimliyinin ayrılmaz tərkib hissəsi olduğu vurğulanır.

Fərmanda dövlətin mədəni və dil müxtəlifliyinin qorunmasına sadiqliyi təsdiqlənir, kürd vətəndaşların irsini və sənətini yaşatmaq, ana dillərini inkişaf etdirmək hüquqları təmin edilir.

Kürd dili milli dil kimi tanınır və kürd əhalisinin sıx olduğu bölgələrdə dövlət və özəl məktəblərdə seçmə fənn kimi və ya təhsil-mədəni fəaliyyətlər çərçivəsində tədris oluna bilər.

Həsəkə vilayətində 1962-ci il siyahıyaalınmasından irəli gələn istisnai qanun və tədbirlər ləğv edilir; Suriyada yaşayan bütün kürd mənşəli vətəndaşlara, qeydiyyatı qapalı olanlar da daxil olmaqla, Suriya vətəndaşlığı verilir və tam bərabərlik təmin olunur.

Həmçinin 21 mart – Novruz bayramı yazı və qardaşlığı simvolizə edən milli bayram kimi ölkə üzrə ödənişli rəsmi istirahət günü elan edilir; media və təhsil qurumları inklüziv milli diskursu mənimsəmək öhdəliyi daşıyır və etnik və ya dil əsaslı hər cür ayrı-seçkilik qadağan olunur.

Fərman Rəsmi Qəzetdə dərc edildiyi tarixdən qüvvəyə minib.