Azərbaycan News Agency

CCTV-nin məlumatına görə, Yəmən Prezident Rəhbərlik Şurası (PLC) husilərlə siyasi həll səylərinin nəticəsiz qalmasından sonra hərbi hazırlığın artırılması məqsədilə Səudiyyə Ərəbistanının rəhbərlik etdiyi koalisiyanın komandanlığı altında Ali Hərbi Komitə yaradıldığını bildirib.

PLC-nin sədri Rəşad əl-Alimi yeni komitənin hökumətyönlü qüvvələrin hazırlanması, təchiz edilməsi və idarə olunmasına cavabdeh olacağını deyib.

Əl-Alimi həmçinin Hadramaut, Əl-Məhra və Aden başda olmaqla cənubdakı bəzi vilayətlərdə hökumət qüvvələrinin Cənub Keçid Şurasından dövlət qurumları və hərbi bazalar üzərində nəzarəti yenidən bərpa etdiyini bildirib və cənub qrupları ilə dialoq iclaslarının keçiriləcəyini vurğulayıb.

Açıqlama Səudiyyə Ərəbistanının dəstəklədiyi hökumətlə Birləşmiş Ərəb Əmirliklərinin dəstək verdiyi iddia edilən Cənub Keçid Şurası arasında son dövrdə yaşanan gərginlik və toqquşmalardan sonra verilib.