Azərbaycan News Agency

Azərbaycan Prezidenti İlham Əliyev 17-22 may tarixlərində Bakıda keçiriləcək Dünya Şəhərsalma Forumuna hazırlıq işləri ilə yerində tanış olub. Forum çərçivəsində təhlükəsiz və dayanıqlı şəhərlər mövzusu müzakirə olunacaq.

İlham Əliyev, 17-22 may tarixlərində Bakı Olimpiya Stadionunda keçiriləcək “Hamı üçün Yaşayış Məkanları: Təhlükəsiz və Dayanıqlı Şəhərlər və Yaşayış Məntəqələri” mövzusunda 13-cü Dünya Şəhərsalma Forumunun hazırlıq işləri ilə yerində tanış olub.

Baxış zamanı Azərbaycan Dövlət Şəhərsalma və Arxitektura Komitəsinin sədri Anar Quliyev və WUF13 Azərbaycan Əməliyyat Şirkətinin icraçı direktoru Adil Məmmədov Prezident Əliyevə görülən işlər barədə məlumat veriblər.

Bildirilib ki, forum çərçivəsində qeydiyyat, sessiyalar, sərgilər, media, nəqliyyat, texniki dəstək, könüllülər və məkan xidmətləri inteqrasiya olunmuş əməliyyat sistemi vasitəsilə həyata keçiriləcək. Yüksək səviyyəli dövlət nümayəndələri və heyətlər üçün xüsusi sahələr ayrılıb, ikitərəfli görüşlər və rəsmi təmaslar üçün ayrıca bölmələr hazırlanıb.

Təşkilat çərçivəsində gündəlik təxminən 300 paralel sessiya, iclas və tədbirin keçirilməsinin planlaşdırıldığı bildirilib.